یقین ہے آرمینیا ایران کی سلامتی کیخلاف کوئی قدم نہیں اٹھائے گا: عباس عراقچی

ایرانی وزیرِ خارجہ عباس عراقچی نے خطے میں بالعموم اور قفقاز (Caucasus) کے خطے میں بالخصوص امریکی فوجی یا سیاسی اثر و رسوخ اور موجودگی پر گہری تشویش کا اظہار کرتے ہوئے کہا ہے کہ ایران اپنی سرحدوں کے قریب امریکی اقدامات کے حوالے سے انتہائی حساس ہے۔

تہران میں ذرائع ابلاغ سے گفتگو کرتے ہوئے عباس عراقچی نے کہا کہ ایران اپنے قریبی پڑوسی ملک آرمینیا اور خطے کی صورتحال پر کڑی نظر رکھے ہوئے ہے۔ انہوں نے واضح کیا کہ ہم اپنے سرحدی و قریبی خطے میں امریکی موجودگی کو اپنی قومی سلامتی کے تناظر میں تشویشناک سمجھتے ہیں اور اس حوالے سے آرمینیائی حکام کے ساتھ براہِ راست اور مسلسل رابطہ برقرار رکھا ہوا ہے۔

ایرانی وزیرِ خارجہ نے امید ظاہر کی کہ آرمینیا اپنے ہمسایہ اور دوست ملک ایران کی سلامتی اور خطے کے توازن کو نقصان پہنچانے والا کوئی بھی قدم نہیں اٹھائے گا۔ انہوں نے زور دیا کہ علاقائی تنازعات کا حل صرف خطے کے ممالک کے باہمی مذاکرات اور تعاون سے ممکن ہے، نہ کہ بیرونی قوتوں کی مداخلت سے۔