سندھ حکومت کا انٹرن شپ اور روزگار کے مواقع بڑھانے کا فیصلہ

سندھ حکومت نے صوبے کے طلبہ اور فارغ التحصیل نوجوانوں کے لیے انٹرن شپ اور باوقار روزگار کے مواقع فراہم کرنے کے حوالے سے بڑا اقدام اٹھاتے ہوئے 100 سے زائد نجی اور سرکاری کمپنیوں کے ساتھ رابطے تیز کر دیے ہیں۔

سینئر صوبائی وزیر شرجیل انعام میمن کے مطابق حکومت کے پورٹل ‘آئی ورک فار سندھ’ (I Work For Sindh) کے ذریعے نوجوانوں کی فنی مہارتوں اور مارکیٹ کی جدید ضروریات میں ہم آہنگی پیدا کی جا رہی ہے۔ اس ڈیجیٹل پلیٹ فارم کو اب تک 51 لاکھ 90 ہزار سے زائد افراد وزٹ کر چکے ہیں، جبکہ اس پر 1 لاکھ 36 ہزار 547 امیدوار اور 721 کمپنیاں رجسٹرڈ ہو چکی ہیں۔

شرجیل میمن نے تفصیلات بتاتے ہوئے کہا کہ پورٹل کے ذریعے اب تک 31 ہزار 270 ملازمتوں کے مواقع پوسٹ کیے گئے ہیں، جن پر امیدواروں کی جانب سے 4 لاکھ 73 ہزار سے زائد درخواستیں وصول کی جا چکی ہیں۔ اس کے علاوہ پلیٹ فارم پر بین الاقوامی سطح پر تسلیم شدہ 1,800 سے زائد مختصر تربیتی کورسز کی سہولت بھی دی گئی ہے، جن سے ہزاروں نوجوان استفادہ کر رہے ہیں۔ صوبائی وزیر نے مزید بتایا کہ اگلے ڈیڑھ سے دو ماہ میں سرکاری و نجی شعبے کی ملازمتوں کو پورٹل پر خودکار (Automatic) طریقے سے شامل کرنے کا جدید نظام اور روزانہ جاب الرٹس کی سہولت بھی متعارف کرائی جا رہی ہے