وفاقی حکومت نے گورنر خیبرپختونخوا کی تبدیلی کا امکان مسترد کردیا

وفاقی حکومت نے خیبرپختونخوا کے گورنر کی تبدیلی کی افواہوں اور امکانات کو مکمل طور پر مسترد کر دیا ہے۔

وفاقی وزیر برائے پارلیمانی امور ڈاکٹر طارق فضل چوہدری نے صحافیوں سے گفتگو کرتے ہوئے واضح کیا کہ خیبرپختونخوا میں گورنر راج یا ایمرجنسی کے نفاذ کے پیچھے کوئی سیاسی مقاصد حاصل کرنا نہیں ہے۔ ان کا کہنا تھا کہ حکومت کا واحد اور بنیادی مقصد خیبرپختونخوا سے دہشت گردی کا مکمل خاتمہ اور صوبے میں دائمی امن کا قیام ہے۔

طارق فضل چوہدری نے تفصیل بتاتے ہوئے کہا کہ دہشت گردی سے متاثرہ 12 اضلاع میں سیکیورٹی فورسز کی جانب سے ٹارگٹڈ اقدامات کیے جائیں گے اور ان تمام علاقوں کو دہشت گردوں کے اثر و رسوخ سے پاک کیا جائے گا۔ انہوں نے یقین دہانی کرائی کہ امن و امان کی صورتحال مکمل طور پر کنٹرول میں آنے کے فوراً بعد صوبے کا تمام تر نظم و نسق صوبائی حکومت کے حوالے کر دیا جائے گا۔ وفاقی وزیر نے مزید کہا کہ وزیراعظم شہباز شریف نے اپوزیشن کو کھلے دل سے مذاکرات کی دعوت دی ہے اور اگر اپوزیشن ملک کی خاطر بامقصد گفتگو کے لیے آگے آتی ہے تو حکومت اس کا خیرمقدم کرے گی۔