فضل الرحمٰن سے دہشتگردوں کے پشت پناہوں کی حمایت کی توقع نہیں تھی: مریم نواز

وزیراعلیٰ پنجاب مریم نواز شریف نے جمعیت علمائے اسلام (ف) کے سربراہ مولانا فضل الرحمٰن کے حالیہ بیان پر شدید ردِعمل کا اظہار کرتے ہوئے کہا ہے کہ مولانا فضل الرحمٰن جیسے سینئر سیاستدان، جو خود اور ان کی جماعت دہشت گردی کا شکار رہی ہے، ان سے دہشت گردی کی پشت پناہی کرنے والوں کی حمایت کی توقع نہیں تھی۔

سماجی رابطے کی ویب سائٹ ایکس (X) پر جاری اپنے تفصیلی بیان میں مریم نواز نے کہا کہ خیبر پختونخوا کو 13 سال تک نااہلی، کرپشن اور دہشت گردوں کو پناہ گاہیں فراہم کرنے والوں کے کٹہرے میں کھڑا کرنے کے بجائے ان کی صفائی دینا نہایت افسوسناک ہے۔ انہوں نے کہا کہ جن کی حمایت میں بیانات دیے جا رہے ہیں انہوں نے خیبر پختونخوا کے وسائل دھرنوں اور احتجاجوں پر ضائع کیے اور دہشت گردوں کو پال پوس کر ملک پر حملہ آور ہونے کے مواقع فراہم کیے۔

وزیراعلیٰ پنجاب نے پاک فوج کے سپہ سالار اور شہدا کی قربانیوں کا ذکر کرتے ہوئے کہا کہ پاک فوج کے جوان روزانہ دہشت گردی کے خلاف سرحدوں پر اپنی جانیں قربان کر رہے ہیں۔ انہوں نے مولانا فضل الرحمٰن کو مخاطب کرتے ہوئے کہا کہ شہدا کے خون کو سلام پیش کرنے کے بجائے دہشت گردی کے سرپرستوں کے ساتھ کھڑا ہونا کسی طرح مناسب نہیں، اور پی ٹی آئی اپنے صوبائی اقتدار کے خاتمے کی خود ذمہ دار ہے۔