چین کا اسرائیل سے مغربی کنارے میں بستیوں کے قیام کا فیصلہ واپس لینے کا مطالبہ

چینی وزیرِ خارجہ وانگ یی نے آذربائیجان کے دارالحکومت باکو میں منعقدہ بین الاقوامی اجلاس کے موقع پر اسرائیلی صدر اسحاق ہرزوگ سے ملاقات کرتے ہوئے مطالبہ کیا ہے کہ اسرائیل مقبوضہ مغربی کنارے میں غیر قانونی یہودی بستیوں کے جبری قیام اور توسیع کو فوری طور پر روکے اور اس حوالے سے کیے گئے فیصلوں کو واپس لے۔

چینی وزارتِ خارجہ کی جانب سے جاری باضابطہ اعلامیے کے مطابق وزیرِ خارجہ وانگ یی نے اسرائیلی صدر پر واضح کیا کہ بیجنگ کا دیرینہ اور غیر متزلزل موقف رہا ہے کہ مسئلہ فلسطین اس صدی کی سب سے بڑی تاریخی ناانصافی ہے۔ انہوں نے تاکید کی کہ مشرقِ وسطیٰ میں دائمی امن، استحکام اور مفاہمت کا قیام چین کی خطے سے متعلق پالیسی کا بنيادی ستون ہے، اور چین سمجھتا ہے کہ دو ریاستی حل (Two-State Solution) ہی اس تنازع کا واحد اور درست راستہ ہے۔

چینی وزیرِ خارجہ نے مزید زور دیتے ہوئے کہا کہ موجودہ وقت کی اہم ترین ترجیح غزہ کی پٹی تک انسانی امداد کی مکمل اور بلا تعطل رسائی فراہم کرنا ہے تاکہ وہاں جاری سنگین انسانی بحران کو مزید پھیلنے سے روکا جا سکے۔ انہوں نے کہا کہ مغربی کنارے میں یکطرفہ اقدامات اور جبری بستیوں کا قیام امن کی کوششوں کو شدید نقصان پہنچا رہا ہے جسے اسرائیل کو فوری طور پر روکنا ہو گا۔