ٹرمپ نے بحر الکاہل اور بحر اوقیانوس میں سے کسی ایک کا نام تبدیل کرکے ’بحر ٹرمپ‘ رکھنے کی تجویز دے دی

امریکی صدر ڈونلڈ ٹرمپ نے دنیا کے عظیم ترین سمندروں بحر الکاہل (Pacific Ocean) یا بحر اوقیانوس (Atlantic Ocean) میں سے کسی ایک کا نام تبدیل کر کے اپنے نام پر ‘بحر ٹرمپ’ (Trump Ocean) رکھنے کی منفرد تجویز دے دی ہے۔ امریکی اخبار کی رپورٹ کے مطابق ریاست ٹینیسی کے شہر کلارکس ول میں ایک بڑی عوامی ریلی سے خطاب کرتے ہوئے صدر ٹرمپ نے کہا کہ ہمارے پاس اب ایک عظیم خلیج ہے اور ایک خوبصورت جھیل بھی موجود ہے، اب کسی نے ان سے کہا ہے کہ آپ کو ایک دریا اور سمندر کی بھی ضرورت ہے۔

ریلی کے دوران حاضرین کی تالیوں اور قہقہوں کی گونج میں گفتگو کرتے ہوئے صدر ٹرمپ نے کہا کہ وہ بحر اوقیانوس یا بحر الکاہل کا نام تبدیل کر سکتے ہیں۔ انہوں نے تجویز دیتے ہوئے کہا کہ ’ہم اسے بحر ٹرمپ یا ‘اوشن آف دی امریکاز’ (Ocean of the Americas) یا ایسا ہی کوئی اور نام دے سکتے ہیں۔‘ ان کا مزید کہنا تھا کہ ‘میرے عہدہ چھوڑنے سے پہلے ہمارے پاس ایک سمندر ہونا چاہیے اور ہمیں ایک عظیم دریا کی بھی ضرورت ہے۔’

واضح رہے کہ امریکی صدر ڈونلڈ ٹرمپ اس سے قبل بھی خطے کے اہم جغرافیائی ناموں کو تبدیل کرنے کے حوالے سے متنازع اقدامات کر چکے ہیں۔ انہوں نے گزشتہ سال ‘خلیج میکسیکو’ (Gulf of Mexico) کا نام تبدیل کر کے ‘خلیج امریکا’ رکھ دیا تھا، جس پر میکسیکو کے ساتھ شدید سفارتی کشیدگی پیدا ہو گئی تھی اور عالمی خبر رساں ادارے ‘ایسوسی ایٹڈ پریس’ (AP) کی جانب سے نیا نام استعمال کرنے سے انکار پر ایک بڑا تنازع کھڑا ہو گیا تھا۔ بعد ازاں کینیڈا کے ساتھ ٹیرف اور تجارتی تنازع کے دوران رواں سال اگست میں صدر ٹرمپ نے کینیڈا اور امریکا کی سرحد پر واقع جھیل ‘اونٹاریو’ (Lake Ontario) کا نام بھی تبدیل کر کے ‘لیک امریکا’ (Lake America) رکھ دیا تھا اور اس کا اے آئی سے بنایا گیا بورڈ بھی سوشل میڈیا پر شیئر کیا تھا