افغانستان سے سرحد پار دہشت گردی کے شواہد ایک بار پھر سامنے آگئے

افغان طالبان رجیم کی سرپرستی میں افغان سر زمین سے سرحد پار دہشت گردی کے خلاف پاکستان کے مؤقف کے واضح اور ناقابلِ تردید شواہد ایک بار پھر عالمی سطح پر سامنے آ گئے ہیں۔ بین الاقوامی تحقیقی جریدے ‘دی پالیسی ڈائیجسٹ’ (The Policy Digest) کی ایک خصوصی رپورٹ کے مطابق امریکی خفیہ ایجنسی (CIA) کی سابق ٹارگٹنگ افسر سارہ ایڈمز نے بھی افغانستان میں موجود دہشت گردوں کے مضبوط مراکز اور محفوظ پناہ گاہوں کی باقاعدہ تصدیق کر دی ہے۔

سارہ ایڈمز کی رپورٹ کے مطابق 21 ستمبر کو پاکستان کی جانب سے کیے گئے انتہائی درست اور ہدف پر مبذول فضائی حملوں میں مشرقی افغانستان میں واقع دہشت گردوں کے اہم ٹھکانوں کو نشانہ بنایا گیا۔ رپورٹ کے مطابق صوبہ پکتیکا اور کنڑ میں قائم تین اہم ترین مراکز پر پاک فوج کی اس مؤثر کارروائی کے نتیجے میں ‘فتنہ الخوارج’ (تحریک طالبان پاکستان) کے 19 خطرناک دہشت گرد ہلاک جبکہ 11 سے زائد شدید زخمی ہوئے۔

سارہ ایڈمز نے مزید انکشاف کیا کہ پاکستانی فضائی کارروائی میں خودکش بمباروں کی تربیت گاہ، دہشت گردوں کی سہولت کاری کا اہم مرکز اور فتنہ الخوارج و داعش (ISIS-K) کا مشترکہ قائم کردہ ہیڈکوارٹر مکمل طور پر تباہ کر دیا گیا۔ اس بین الاقوامی تحقیقی رپورٹ نے جہاں افغانستان میں دہشت گردوں کے منظم ٹھکانوں کا پردہ چاک کیا ہے، وہیں پاک فوج کی جانب سے کیے جانے والے انٹیلی جنس بیسڈ آپریشنز اور پاکستان کے مسلسل عالمی مؤقف کی مکمل تائید و توثیق بھی کر دی ہے۔