آبنائے ہرمز میں سُپر آئل ٹینکر کے بارودی سرنگ سے ٹکرانے کی ویڈیو جاری

ایران کے پاسداران انقلاب (IRGC) نے آبنائے ہرمز کے ستراتیژیک سمندری راستے میں ایک سُپر آئل ٹینکر کے سمندری بارودی سرنگ (Naval Mine) سے ٹکرانے اور اس میں ہولناک دھماکے کی ویڈیو جاری کر دی ہے۔ پاسداران انقلاب کی بحریہ کے شعبہ تعلقاتِ عامہ کے مطابق یہ واقعہ آبنائے ہرمز کے جنوبی حصے میں پیش آیا جہاں بین الاقوامی قوانین کی خلاف ورزی کرنے والا سپر آئل ٹینکر بارودی سرنگ سے ٹکرا گیا، جس کے نتیجے میں جہاز کے انجن روم میں شدید نوعیت کی آگ بھڑک اٹھی۔

پاسداران انقلاب کے ترجمان کی جانب سے جاری کردہ بیان میں کہا گیا ہے کہ خام تیل سے لدا یہ جہاز آبنائے ہرمز کے سیکیورٹی قوانین اور پروٹوکولز کی سنگین خلاف ورزی کرتے ہوئے غیر مجاز راستے سے خفیہ طور پر گزرنے کی کوشش کر رہا تھا۔ جہاز نے گرفتاری اور نشاندہی سے بچنے کے لیے اپنے تمام نیویگیشن اور ٹریکنگ سسٹمز مکمل طور پر بند کر رکھے تھے۔

اس واقعے اور ویڈیو کی اشاعت کے فوراً بعد ایرانی بحریہ نے بین الاقوامی جہاز رانی کے لیے ایک انتہائی سخت اور نیا انتباہ جاری کیا ہے۔ ایرانی حکام نے واضح کیا ہے کہ آبنائے ہرمز کی حدود میں جو بھی جہاز اپنے نیویگیشن اور شناختی نظام (AIS) کو بند کرے گا، اسے ایرانی افواج کی جانب سے براہ راست دشمن کا جہاز تصور کیا جائے گا اور اس کے خلاف بلا تفریق پوری فوجی طاقت کے ساتھ فیصلہ کن اور سخت ترین کارروائی کی جائے گی۔