بھارتی ریاست منی پور میں بدامنی، مودی حکومت کشیدگی پر قابو پانے میں بری طرح ناکام

نریندر مودی کی قیادت میں بھارتی حکومت کی ناکام اور ناقص پالیسیوں کے باعث ریاست منی پور میں حالات روز بروز مزید سنگین اور دھماکے دار شکل اختیار کرتے جا رہے ہیں۔ بھارتی جریدے ‘انڈیا ٹوڈے’ کی رپورٹ کے مطابق نامعلوم مسلح افراد کی فائرنگ سے 5 بچوں کی ماں اور ایک 22 سالہ خاتون کی ہلاکت کے بعد خطے میں تشدد اور فسادات کی ایک نئی لہر بھڑک اٹھی ہے، جس کے بعد نسلی اور مسلح گروہوں کے درمیان خونی جھڑپیں انتہائی شدت اختیار کر گئی ہیں۔

رپورٹ میں بتایا گیا ہے کہ حالیہ پرتشدد واقعات کے دوران درجنوں گھروں کو نذرِ آتش کر دیا گیا ہے جبکہ پوری ریاست شدید کشیدگی اور خوف و ہراس کی لپیٹ میں ہے۔ ان تازہ جھڑپوں نے مودی حکومت کے منی پور میں امن و امان قائم کرنے کے تمام دعوؤں کے پول کھول دیے ہیں اور سیکیورٹی کی مجموعی صورتحال پر گہرے سوالات کھڑے کر دیے ہیں۔

دوسری جانب بین الاقوامی اور مقامی انسانی حقوق کے ماہرین نے منی پور کی ابتر ہوتی صورتحال پر شدید تشویش کا اظہار کرتے ہوئے بھارتی حکومت کے ناکافی اقدامات اور مجرمانہ غفلت کو کڑی تنقید کا نشانہ بنایا ہے۔ ماہرین کا کہنا ہے کہ ریاست میں مسلسل جاری تشدد، قتل و غارت گری اور بربریت کے واقعات اس بات کا تقاضا کرتے ہیں کہ متاثرہ آبادیوں کے تحفّظ اور علاقے میں پائیدار امن کے قیام کے لیے محض کھوکھلے دعوؤں کے بجائے ہنگامی اور سنجیدہ بنیادوں پر عملی اقدامات کیے جائیں۔