جبوتی سے یمن جانیوالے تارکین وطن کی کشتی الٹ گئی، 15 بچوں سمیت 139 افراد ہلاک

افریقی ملک جبوتی کے ساحل کے قریب تارکینِ وطن کی ایک اور زبردست المیہ سامنے آیا ہے، جہاں یمن جانے والی مسافروں سے کھچا کھچ بھری کشتی سمندر میں الٹ جانے کے نتیجے میں 15 بچوں سمیت کم از کم 139 افراد ہلاک ہو گئے ہیں۔ برطانوی میڈیا اور عالمی امدادی اداروں کی رپورٹ کے مطابق سمندری حادثہ 8 اور 9 اکتوبر کی درمیانی شب پیش آیا، جب لکڑی کی ایک نااہل کشتی تقریباً 300 تارکینِ وطن کو لے کر خطرناک سمندری راستے سے خلیجی ممالک کی طرف گامزن تھی۔

اقوامِ متحدہ کے ذیلی ادارے ‘عالمی ادارہ برائے مہاجرین’ (IOM) اور ریسکیو حکام نے تصدیق کی ہے کہ امدادی کارروائیوں کے دوران 60 سے زائد افراد کو زِندہ بچا لیا گیا ہے جبکہ 80 سے زائد مسافر اب بھی کھلے سمندر میں لاپتا ہیں، جن کی تلاش کا کام جاری ہے۔ رپورٹ کے مطابق زندہ بچ جانے والے تمام 60 سے زائد افراد کا تعلق افریقی ملک ایتھوپیا سے ہے۔ عالمی ادارے نے مزید بتایا کہ اب تک سمندر سے برآمد کی گئی لاشوں میں 42 لاشیں خواتین کی بھی شامل ہیں۔

عالمی ادارہ برائے مہاجرین کے مطابق ہر سال ‘ہارن آف افریقہ’ (Horn of Africa) کے خطے یعنی ایتھوپیا، صومالیہ، اریٹریا اور جبوتی سے تعلق رکھنے والے ہزاروں غریب اور بے گھر تارکینِ وطن روزگار اور محفوظ مستقبل کی تلاش میں خلیجی ممالک بالخصوص سعودی عرب اور امارات پہنچنے کے لیے باب المندب اور بحیرہ احمر کا یہ انتہائی خطرناک اور غیر قانونی راستہ اختیار کرتے ہیں، جہاں اکثر اس نوعیت کے دلخراش حادثات پیش آتے رہتے ہیں۔