خیبر پختونخوا پولیس میں بڑے پیمانے پر تبادلے اور تقرریاں، 18 افسران تبدیل

خیبر پختونخوا میں ایمرجنسی اور نئے انتظامی سیٹ اپ کے نفاذ کے بعد انسپکٹر جنرل (آئی جی) پولیس ذوالفقار حمید نے خیبر پختونخوا پولیس کے شعبہ ہائے جات، ریجنز اور ضلعی کمانڈز میں بڑے پیمانے پر ردوبدل کرتے ہوئے 18 سینئر افسران کے تبادلوں اور تقرریوں کا باضابطہ نوٹیفکیشن جاری کر دیا ہے۔ احکامات کے تحت کئی سینئر افسران بشمول آئی جی ٹریننگ ڈاکٹر فصیح الدین، ڈی آئی جی لیگل ہمایوں مسعود سندھو اور آر پی او کوہاٹ عرفان طارق کو تبدیل کر کے اسٹیبلشمنٹ ڈویژن اسلام آباد رپورٹ کرنے کی ہدایت کی گئی ہے۔ نئی تقرریوں میں سید فدا حسن شاہ کو ڈی آئی جی آپریشنز کے پی، لیفٹیننٹ (ر) ناصر محمود ستی کو کمانڈنٹ ایف آر پی، جہانزیب نذیر خان کو آر پی او ہزارہ، شاکر حسین داوڑ کو آر پی او کوہاٹ اور زاہد نواز کو آر پی او ملاکنڈ تعینات کیا گیا ہے۔ علاوہ ازیں سوات، مانسہرہ، کرک، ہری پور اور لوئر چترال کے ڈی پی اوز کے عہدوں میں بھی فوری تبدیلیوں کا حکم دیا گیا ہے تاکہ انتظامی اور آپریشنل کنٹرول کو مؤثر بنایا جا سکے۔