حکومت نے عوام پر معاشی دہشت گردی مسلط کر رکھی ہے: حافظ نعیم الرحمان

امیر جماعت اسلامی حافظ نعیم الرحمان نے حکومت پر معاشی دہشت گردی مسلط کرنے کا الزام عائد کرتے ہوئے کہا ہے کہ مہنگائی اور معاشی بحران کے باعث پوری قوم پریشان حال ہے جبکہ حکمران عیاشیوں میں مصروف ہیں۔ پنجاب کے شہر اوکاڑہ میں بڑے جلسہ عام سے خطاب کرتے ہوئے انہوں نے پٹرولیم مصنوعات پر عائد لیوی کو ‘جگا ٹیکس’ قرار دیا اور کہا کہ حکومت مہینے میں 27 ارب روپے کا جزوی ریلیف دے کر لیوی کی مد میں 150 ارب روپے وصول کر رہی ہے۔ حافظ نعیم الرحمان نے واضح کیا کہ جماعت اسلامی نے آئی پی پیز (IPPs) اور بجلی کے ظالمانہ بلوں کے خلاف آواز اٹھا کر قوم کو شعور دیا اور 42 شہروں میں دھرنے دے کر تحریک کو زندہ کیا۔ انہوں نے تنبیہ کی کہ فی الحال لانگ مارچ کو صرف وقفہ دیا گیا ہے، اگر حکومت نے معاشی مظالم کا سلسلہ اور ناانصافیاں ختم نہ کیں تو عوام دوبارہ سڑکوں پر نکلنے اور لانگ مارچ کی تحریک شروع کرنے کے لیے مکمل طور پر تیار ہیں۔