وفاقی دارالحکومت میں ریڈ الرٹ جاری: حساس عمارتوں پر رینجرز تعینات، دفعہ 144 کی خلاف ورزی پر گرفتاریوں کا حکم

خیبر پختونخوا میں ایمرجنسی کے نفاذ اور سیاسی تحرک کے پیشِ نظر وفاقی دارالحکومت اسلام آباد میں ہنگامی طور پر ریڈ الرٹ جاری کر دیا گیا ہے۔ سیکیورٹی کے سخت ترین انتظامات کے تحت تمام چوک چوراہوں، اہم شاہراہوں اور شہر کے داخلی و خارجی راستوں پر پولیس اور قانون نافذ کرنے والے اداروں کی بھاری نفری تعینات کر دی گئی ہے۔ تمام ایس پیز، ڈی ایس پیز اور ایس ایچ اوز کو خود فیلڈ میں موجود رہنے کی ہدایت کی گئی ہے جبکہ حساس عمارتوں اور ریڈ زون کی سیکیورٹی رینجرز کے حوالے کر کے غیر متعلقہ افراد کے داخلے پر مکمل پابندی عائد کر دی گئی ہے۔ پولیس انتظامیہ نے دفعہ 144 کی خلاف ورزی کرنے والوں کے خلاف فوری گرفتاری اور کسی بھی مقام پر ہجوم بنانے یا احتجاجی بینرز آویزاں کرنے پر بلا تاخیر سخت قانونی کارروائی کا حکم جاری کیا ہے۔