پختونخوا میں ایمرجنسی: اڈیالہ جیل کے اطراف میں سکیورٹی ہائی الرٹ

خیبر پختونخوا میں ایمرجنسی کے باضابطہ نفاذ کے فوری بعد اڈیالہ جیل اور اس کے گردونواح میں سیکیورٹی انتہائی سخت کر دی گئی ہے۔ پولیس ذرائع کے مطابق اڈیالہ جیل کے اطراف 6 کلومیٹر کے علاقے میں اضافی پولیس اہلکار اور کسی بھی نوعیت کے احتجاج یا بدامنی سے نمٹنے کے لیے اینٹی رائٹ فورس کی بھاری نفری تعینات کر دی گئی ہے۔ انتظامیہ نے اڈیالہ روڈ پر 8 نئے سیکیورٹی ناکے قائم کر دیے ہیں جہاں سے گزرنے والی تمام گاڑیوں کی سخت تلاشی اور شہریوں کے شناختی کارڈ کی چیکنگ کا سلسلہ جاری ہے۔ پولیس نے مقامی رہائشیوں اور مسافروں کو ہدایت کی ہے کہ وہ کسی بھی زحمت سے بچنے کے لیے اپنے شناختی کارڈ لازمی ساتھ رکھیں۔ واضح رہے کہ ضلعی انتظامیہ نے امن و امان برقرار رکھنے کے لیے علاقے میں پہلے ہی 8 نومبر تک دفعہ 144 نافذ کر رکھی ہے۔