کراچی؛ آٹے کی قیمت میں مزید اضافے کا خدشہ ہے، ہول سیل گروسرز ایسوسی ایشن

کراچی میں بڑھتی ہوئی مہنگائی اور گندم کے ممکنہ بحران پر شدید تشویش کا اظہار کرتے ہوئے ہول سیل گروسرز ایسوسی ایشن کے رہنما عبدالرؤف ابراہیم نے خبردار کیا ہے کہ آنے والے دنوں میں ملک بھر بالخصوص کراچی میں آٹے کی قیمتوں میں مزید اضافے کا شدید خدشہ ہے۔ انہوں نے میڈیا سے گفتگو کرتے ہوئے بتایا کہ شہر میں چھوٹی چکی کا آٹا پہلے ہی 200 روپے فی کلو تک کی بلند ترین سطح پر پہنچ چکا ہے، جبکہ چھوٹی چکیوں کو صاف گندم 160 روپے فی کلو کے حساب سے مل رہی ہے۔ عبدالرؤف ابراہیم نے مزید انکشاف کیا کہ عام گندم کی ہول سیل قیمت بھی بڑھ کر 145 سے 150 روپے فی کلو تک جا پہنچی ہے۔ حکومت پر تنقید کرتے ہوئے انہوں نے کہا کہ گندم کی امدادی قیمت مقرر کرنے سے قبل کسانوں کے اصل اخراجات کو مدنظر رکھنا چاہیے تھا اور کسانوں کو سب سے پہلے مالی سپورٹ فراہم کی جانی چاہیے تھی۔ انہوں نے سوال اٹھایا کہ گندم کی قیمتوں کے تناظر میں 55 ارب روپے کے ریلیف کا اعلان پہلے کیوں نہیں کیا گیا؟ حکومتی پالیسیوں کو ہدفِ تنقید بناتے ہوئے ان کا کہنا تھا کہ گندم کی درآمد کے باوجود مطلوبہ طلب پوری نہیں ہو سکے گی اور حکومت اس معاملے پر درست بیانیے سے گریزاں ہے۔ انہوں نے مطالبہ کیا کہ گندم کے ذخیرہ اندوزوں کے خلاف ایک بڑا اور فیصلہ کن کریک ڈاؤن کیا جائے تاکہ غریب عوام کے لیے آٹا خریدنا مزید ناممکن نہ بنایا جا سکے۔