بلوچستان میں سی ٹی ڈی کی کارروائی، فتنہ الہندوستان کے 10 دہشتگرد ہلاک

بلوچستان کے ضلع بارکھان میں کاؤنٹر ٹیررازم ڈیپارٹمنٹ (سی ٹی ڈی) نے ایک اہم خفیہ اطلاع پر کارروائی کرتے ہوئے بھارت کے زیرِ سرپرستی کام کرنے والے دہشت گرد گروہ “فتنہ الہندوستان” کے 10 دہشت گردوں کو ہلاک کر دیا ہے۔ سی ٹی ڈی بلوچستان کے ترجمان اور صوبائی مشیر بابر یوسفزئی کے مطابق یہ کامیاب انٹیلی جنس بیسڈ آپریشن (IBO) بارکھان کے علاقے میں دہشت گردوں کی موجودگی کی تصدیق کے بعد کیا گیا۔

ترجمان کے مطابق شدید فائرنگ کے تبادلے کے بعد 10 مسلح دہشت گرد موقع پر ہی مارے گئے جبکہ کارروائی کے دوران سی ٹی ڈی کے 2 اہلکار بھی زخمی ہوئے جنہیں فوری طور پر طبّی امداد کے لیے اسپتال منتقل کر دیا گیا ہے۔ ہلاک دہشت گردوں کے قبضے سے بھاری مقدار میں جدید اسلحه، خودکار رائفلیں اور دھماکہ خیز مواد برآمد کر لیا گیا ہے۔ وزیراعلیٰ بلوچستان سرفراز بگٹی اور وفاقی وزیر داخلہ محسن نقوی نے سی ٹی ڈی جوانوں کی بہادری اور کامیاب آپریشن پر خراجِ تحسین پیش کرتے ہوئے اعادہ کیا ہے کہ سیکورٹی فورسز، پولیس اور سی ٹی ڈی صوبے سے دہشت گردی کے مکمل خاتمے کے لیے پرعزم ہیں۔