برطانیہ: سابق وزیر اعظم اسٹارمر کے استعفے سے خالی نشست پر ضمنی الیکشن میں باحجاب خاتون کامیاب

لندن میں سابق برطانوی وزیراعظم سر کیئر اسٹارمر کے استعفیٰ کے باعث خالی ہونے والی پارلیمنٹ کی نشست پر ہونے والے اہم ضمنی انتخاب میں ایک تاریخ ساز نتیجہ سامنے آیا ہے، جہاں باحجاب خاتون اور صومالیہ نژاد امیدوار ساگل عبدی ولی شاندار کامیابی حاصل کر کے رکنِ پارلیمنٹ منتخب ہو گئی ہیں۔ برطانوی میڈیا کے مطابق لیبر پارٹی کی امیدوار ساگل عبدی ولی نے اس الیکشن میں 12,292 ووٹ حاصل کر کے میدان مار لیا۔

انتخابی نتائج کے بعد اپنے پہلے بیان میں 42 سالہ عبدی ولی نے کہا کہ برطانوی پارلیمنٹ میں اپنے حلقے کی نمائندگی کرنا ان کے لیے انتہائی اعزاز کی بات ہے اور اس وقت حلقے کے عوام بہتر مستقبل اور امید کی طرف دیکھ رہے ہیں۔ اس ضمنی انتخاب میں گرین پارٹی دوسرے، کنزرویٹیو پارٹی تیسرے اور ریفارم یوکے کے امیدوار چوتھے نمبر پر رہے۔ اس شکست کے بعد گرین پارٹی کے رہنما زیک پولانسکی کی قیادت بھی شدید خطرے میں پڑ گئی ہے۔ یاد رہے کہ یہ نشست سابق وزیراعظم سر کیئر اسٹارمر کے استعفیٰ کے بعد خالی ہوئی تھی، جس پر اب لیبر پارٹی نے اپنی پوزیشن برقرار رکھی ہے۔