’’ناروے کو نہیں بھولیں گے‘‘ نوبیل انعام نہ ملنے پر ٹرمپ کی دھمکی آمیز تنقید

امریکی صدر ڈونلڈ ٹرمپ نے سال 2026 کا نوبیل امن انعام نہ ملنے پر سخت برہمی کا اظہار کرتے ہوئے نوبیل کمیٹی کے فیصلے کی شدید الفاظ میں مذمت کی ہے۔ انہوں نے جنوبی افریقہ کی معروف قانون دان اور اقوام متحدہ کی سابق ہائی کمشنر برائے انسانی حقوق ناوی پلے (Navi Pillay) کو امن انعام دینے کے فیصلے کو شرمناک قرار دیتے ہوئے کہا کہ یہ قدم ناروے کے لیے ایک نہ مٹنے والا داغ ہے۔

نیویارک کے شہر سیراکیوز میں ریپبلکن امیدواروں کی انتخابی ریلی سے خطاب کرتے ہوئے امریکی صدر نے دعویٰ کیا کہ عالمی سطح پر متعدد جنگوں کے خاتمے اور امن کے قیام کے لیے ان کی خدمات کے اعتراف میں یہ انعام ان کا حق تھا۔ صدر ٹرمپ نے نوبیل امن کمیٹی پر تنقید کرتے ہوئے کہا کہ “چند نظریاتی اور جمہوریت مخالف افراد نے اس معتبر انعام کی قدروقیمت کو بدنام کر دیا ہے”۔ انہوں نے ناوی پلے کے حوالے سے بھی متنازع بیان دیتے ہوئے کہا کہ وہ ایک ایسی شخصیت ہیں جسے کوئی نہیں جانتا، اور خبردار کیا کہ امریکہ اس فیصلے کو کبھی نہیں بھولے گا۔

واضح رہے کہ نوبیل کمیٹی نے سال 2026 کا نوبیل امن انعام جنوبی افریقہ سے تعلق رکھنے والی معروف قانون دان ناوی پلے کو بین الاقوامی قانون کی پاسداری، انسانی حقوق کے تحفظ، اور دنیا بھر میں جنگی جرائم و نسل کشی کے مرتکب عناصر کو قانون کے کٹہرے میں لانے کے لیے ان کی دہائیوں پر محیط تاریخی خدمات کے اعتراف میں دینے کا اعلان کیا ہے۔