زیلنسکی کا یوکرین کے توانائی نظام کو بڑے پیمانے پر نقصان پہنچنے کا اعتراف

یوکرین کے صدر ولادیمیر زیلنسکی نے اعتراف کیا ہے کہ ملک کے پاور گرڈ، بجلی کی ترسیلی لائنوں اور متعلقہ توانائی تنصیبات کو ایک بار پھر بڑے پیمانے پر شدید نقصان پہنچا ہے۔ توانائی کے بحران کے باعث یوکرین میں مسلسل تیسرے روز بھی طے شدہ اور ہنگامی لوڈشیڈنگ کا سلسلہ جاری ہے، جبکہ دارالحکومت کیف کے میئر وٹالی کلیچکو نے شہر کو بقا کے نظام (Survival Mode) پر منتقل کرنے کا اعلان کیا ہے۔ کیف میں 8 گھنٹے سے زائد بجلی کی بندش سے میٹرو سروس، پبلک ٹرانسپورٹ اور پانی کی فراہمی کا نظام شدید متاثر ہوا ہے۔ حکام نے خدشہ ظاہر کیا ہے کہ بجلی کی موجودہ پیداواری صلاحیت 12 گیگاواٹ ہے جبکہ موسم سرما کی ضرورت 18 سے 19 گیگاواٹ ہے، جس کے باعث شہریوں کو گیس، کوئلے اور پانی کی قلت کا سامنا کرتے ہوئے ایک انتہائی سخت زمستان سے گزرنا پڑ سکتا ہے۔