سہیل آفریدی کا شارٹ مارچ دہشتگرد تنظیموں کے حق میں ہے: عظمیٰ بخاری

وزیر اطلاعات پنجاب عظمیٰ بخاری نے کہا ہے کہ خیبرپختونخوا کے وزیر اعلیٰ سہیل آفریدی کا لانگ مارچ اب ایک ”شارٹ ٹرم مارچ“ میں تبدیل ہو چکا ہے جو بانی پی ٹی آئی یا پختون عوام کے لیے نہیں بلکہ مبینہ طور پر دہشت گرد تنظیموں کے حق میں ہو رہا ہے۔ اپنے ایک بیان میں انہوں نے تنقید کرتے ہوئے کہا کہ ایک طرف پورا خیبرپختونخوا دہشت گردی کی لپیٹ میں اور غیر محفوظ ہے، جبکہ دوسری طرف سڑکوں پر نکالا جانے والا یہ مارچ مکمل طور پر محفوظ ہے۔ عظمیٰ بخاری کا کہنا تھا کہ پی ٹی آئی کی سینئر قیادت ایک ”کنٹینر باز“ کے یرغمال بنی ہوئی ہے جو سکیورٹی فورسز کا مذاق اڑا رہا ہے جبکہ پولیس اور عوام دہشت گردی کے خلاف لازوال قربانیاں دے رہے ہیں۔ انہوں نے مزید کہا کہ صوبے کے عوام اس نالائق ٹولے سے جان چھڑانا چاہتے ہیں اور مسترد ہونے کے بعد اب مصنوعی ذہانت (AI) کے ذریعے جعلی ویڈیوز بنا کر سوشل میڈیا پر ڈالی جا رہی ہیں۔