وزیراعظم کا مولانا فضل الرحمان سے ٹیلیفونک رابطہ، سیاسی صورتحال پر تبادلہ خیال

وزیراعظم محمد شہباز شریف اور جمعیت علمائے اسلام (جے یو آئی) کے سربراہ مولانا فضل الرحمان کے درمیان ٹیلیفونک رابطہ ہوا ہے جس میں ملک کی مجموعی سیاسی صورتحال، خیبرپختونخوا کے حالات اور تحریک انصاف کے ممکنہ لانگ مارچ پر تفصیلی تبادلہ خیال کیا گیا۔ ذرائع کے مطابق وزیراعظم ہاؤس میں ہونے والے اہم اجلاس کے بعد رات گئے یہ رابطہ کیا گیا جس میں مولانا فضل الرحمان نے ایک بار پھر زور دیا کہ تمام سیاسی معاملات افہام و تفہیم کے ذریعے حل کیے جائیں۔ وزیراعظم شہباز شریف نے مولانا کی سیاسی خدمات کو سراہتے ہوئے کہا کہ حکومت ہمیشہ سیاسی مذاکرات کے حق میں رہی ہے مگر اپوزیشن کو وفاق پر چڑھائی یا دھاوا بولنے سے گریز کرنا چاہیے کیونکہ اس سے مسائل حل ہونے کے بجائے مزید پیچیدہ ہوتے ہیں۔ وزیراعظم نے اس عزم کا اعادہ کیا کہ معیشت کی بہتری کے لیے سر توڑ محنت کی گئی ہے اور ملک میں دیرپا سیاسی استحکام اولین ترجیح ہے۔