انمول پنکی کے خلاف منشیات برآمدگی کیس میں پیش رفت

ایڈیشنل ڈسٹرکٹ اینڈ سیشن عدالت میں نامور ڈرگ ڈیلر انمول عرف پنکی کے خلاف منشیات برآمدگی کے مقدمے میں اہم پیش رفت سامنے آئی ہے، جہاں ویڈیو لنک کے ذریعے پیش کی جانے والی ملزمہ کو چاروں گواہوں نے شناخت کر لیا ہے۔ گواہوں میں لیڈی کانسٹیبل سونیہ اشرف، تفتیشی افسر منصور، سب انسپکٹر عبدالستار اور اے ایس آئی اورنگزیب شامل ہیں، جنہوں نے عدالت کو بتایا کہ ملزمہ کو گارڈن کی حدود سے گرفتار کیا گیا تھا اور وہ ایک بڑے منشیات فروش نیٹ ورک کو چلا رہی ہے۔ پبلک پراسیکیوٹر شکیل عباسی کے مطابق ملزمہ کا کال ڈیٹا ریکارڈ (سی ڈی آر) بھی اس بات کی تصدیق کرتا ہے کہ وہ منشیات فروشوں کے ساتھ مسلسل رابطے میں تھی۔ عدالت نے کارروائی کے بعد مزید گواہوں کو آئندہ سماعت پر طلب کرتے ہوئے کیس کی سماعت ملتوی کر دی ہے۔