پاکستان اور بحرین کا تجارت، توانائی اور زراعت میں تعاون بڑھانے پر اتفاق

پاکستان اور بحرین نے تجارت، سرمایہ کاری، توانائی، زراعت، غذائی تحفظ اور انفارمیشن ٹیکنالوجی کے شعبوں میں دوطرفہ تعاون کو مزید وسعت دینے پر اتفاق کیا ہے، جبکہ مشترکہ وزارتی کمیشن کا چوتھا اجلاس آئندہ سال منامہ میں منعقد ہوگا۔ دفتر خارجہ کے مطابق بحرین کے وزیر خارجہ ڈاکٹر عبداللطیف بن راشد الزیانی نے نائب وزیراعظم اور وزیر خارجہ اسحاق ڈار کی دعوت پر پاکستان کا سرکاری دورہ کیا، جہاں انہوں نے صدر، وزیراعظم، آرمی چیف اور نائب وزیراعظم سے اہم ملاقاتیں کیں۔ دونوں وزرائے خارجہ نے پاکستان بحرین مشترکہ وزارتی کمیشن کے تیسرے اجلاس کی مشترکہ صدارت کی اور دوطرفہ تعلقات کو عوامی فلاح کے ٹھوس نتائج میں تبدیل کرنے کے عزم کا اعادہ کیا۔ اس دوران آبنائے ہرمز کی صورتحال سمیت علاقائی و عالمی امور پر بھی تفصیلی تبادلہ خیال کیا گیا، جبکہ بحرین کے وزیر خارجہ نے پاکستانی کمیونٹی کی خدمات اور اقوام متحدہ کی سلامتی کونسل میں پاکستان کے سفارتی کردار کو سراہا۔