مریم نواز کا پنجاب کے ہر ضلع میں پی ایچ اے قائم کرنے کا فیصلہ

وزیراعلیٰ پنجاب مریم نواز شریف کی زیر صدارت منعقدہ اہم اجلاس میں صوبے کے ہر ضلع میں پارکس اینڈ ہارٹی کلچر اتھارٹیز (پی ایچ اے) قائم کرنے کی باضابطہ منظوری دے دی گئی ہے، جبکہ ان اداروں کے لیے 2820 تکنیکی آسامیوں پر بھرتیوں کا بھی فیصلہ کیا گیا ہے۔ اجلاس میں بریفنگ کے دوران بتایا گیا کہ 10 اضلاع میں پی ایچ اے پہلے ہی فعال ہیں جبکہ مزید 11 اضلاع میں نئی اتھارٹیز قائم کی جا چکی ہیں، اور بقیہ اضلاع کے لیے جنوری 2027 کی ڈیڈ لائن مقرر کی گئی ہے جبکہ دوسرے مرحلے میں ہر تحصیل میں بھی پی ایچ اے قائم کی جائے گی۔ وزیراعلیٰ مریم نواز شریف نے ہر شہر، قصبے اور گاؤں کی سطح پر شجرکاری، پارکوں کی بحالی اور موسمی پھولوں کی کاشت کے لیے ماہانہ پلان مرتب کرنے کی ہدایت کی ہے۔ اس کے علاوہ، ہر ضلع میں پی ایچ اے کے زیر انتظام ان ہاؤس نرسریاں قائم کی جائیں گی جہاں کم قیمت پر پودے دستیاب ہوں گے، جبکہ افسران کی کارکردگی جانچنے کے لیے کے پی آئیز تشکیل دینے کا بھی حکم دیا گیا ہے۔