پی ٹی آئی سے مذاکرات میں بڑے بریک تھرو کی زیادہ امید نہیں: رانا ثناء اللہ

وزیراعظم کے مشیر برائے سیاسی امور رانا ثناء اللہ نے کہا ہے کہ تحریک انصاف کے ساتھ مذاکرات میں فی الحال کسی بڑے بریک تھرو کی زیادہ امید نہیں ہے، تاہم فریقین کے درمیان صورتحال اتنی پیچیدہ بھی نہیں کہ بات چیت کا راستہ مکمل طور پر بند ہوجائے۔ ایک نجی ٹی وی پروگرام میں گفتگو کرتے ہوئے انہوں نے انکشاف کیا کہ مذاکرات کے مبینہ طور پر ختم ہونے کے باوجود رابطے اب بھی جاری ہیں اور محسن نقوی کی گوہر خان، عامر ڈوگر اور اسد قیصر سے فون پر بات چیت ہوتی رہی ہے۔ رانا ثناء اللہ نے واضح کیا کہ کسی ٹھوس مفاہمت یا سمجھوتے کے بغیر دوبارہ مذاکرات شروع کرنا مفید نہیں ہوگا، جبکہ حکومت ایک طرف مذاکرات کا جائزہ لے رہی ہے تو دوسری جانب پی ٹی آئی کے ممکنہ لانگ مارچ پر بھی نظر رکھے ہوئے ہے۔ انہوں نے خیبر پختونخوا حکومت کو زور دیا کہ وہ دہشت گردی کے خلاف جنگ میں پولیس، سی ٹی ڈی اور دیگر سول انتظامات کے ذریعے اپنا بھرپور کردار ادا کرے۔ بانی پی ٹی آئی کی ملاقاتوں کے حوالے سے انہوں نے کہا کہ یہ امور جیل مینوئل اور قانون کے مطابق طے ہونے چاہئیں، لیکن ان ملاقاتوں کا سیاسی استعمال بعد میں مسائل کا سبب بنا۔