سرحد پار سے آنے والی آلودہ ہوا سموگ کا سبب، یکطرفہ نہیں علاقائی اپروچ کی ضرورت ہے: مریم اورنگزیب

پنجاب کی سینئر صوبائی وزیر مریم اورنگزیب نے لاہور میں ایک اہم بیان دیتے ہوئے کہا ہے کہ ہواؤں کے رخ کی تبدیلی اور سرحد پار بھارتی شہروں سے آنے والی آلودہ ہوا پاکستان میں بالخصوص پنجاب کے فضائی معیار کو شدید متاثر کر رہی ہے۔ انہوں نے انڈونیشیا کے جنگلات کی آگ سے سنگاپور کی فضا خراب ہونے کی مثال دیتے ہوئے واضح کیا کہ ماحولیاتی بہتری کے اعلیٰ ترین انتظامات کے باوجود سرحد پار سے آنے والی آلودگی سے خطہ متاثر ہوتا ہے، جس کے لیے علاقائی (Regional) اور عالمی (Global) حکمتِ عملی ناگزیر ہے۔

سینئر وزیر نے بتایا کہ وزیراعلیٰ مریم نواز شریف کی قیادت میں پنجاب حکومت سموگ پر قابو پانے کے لیے جامع اور موثر اقدامات کر رہی ہے۔ اس سال فصلوں کی باقیات نہیں جلائی جا رہیں بلکہ 10 ہزار سپر سیڈرز اور جدید زرعی مشینری کے ذریعے گانٹھیں بنائی جا رہی ہیں، جبکہ جدید ڈیجیٹل ماحولیاتی نظام کے تحت صنعتی اخراج اور گاڑیوں کے دھوئیں کی مسلسل مانیٹرنگ کی جا رہی ہے۔ انہوں نے متنبہ کیا کہ فضائی معیار کی بہتری انسانی زندگی سے جڑا ہوا سنگین مسئلہ ہے اور قانون کی خلاف ورزی یا غفلت پر زیرو ٹالرینس کی پالیسی برقرار رہے گی۔