ملک میں سونے کی قیمتوں کو پر لگ گئے: فی تولہ سونا 4 لاکھ 35 ہزار روپے کی سطح سے تجاوز کر گیا

مقامی اور عالمی صرافہ مارکیٹوں میں سونے کی قیمتوں میں اضافے کا سلسلہ جاری ہے، جہاں ملک بھر میں فی تولہ سونا مزید 600 روپے مہنگا ہو گیا ہے۔ اس تازہ اضافے کے بعد پاکستان میں فی تولہ سونے کی قیمت بڑھ کر 4 لاکھ 35 ہزار 36 روپے کی سطح پر پہنچ گئی ہے۔

صرافہ ایسوسی ایشن کے مطابق 10 گرام سونے کی قیمت میں بھی 515 روپے کا اضافہ ریکارڈ کیا گیا ہے، جس کے بعد 10 گرام سونا 3 لاکھ 72 ہزار 973 روپے کا ہو گیا ہے۔ دوسری جانب عالمی مارکیٹ میں بھی فی اونس سونا 6 ڈالر کی بہتری کے ساتھ 4,125 ڈالر پر پہنچ گیا۔ تاہم، چاندی کی قیمتوں میں عکسِ رجحان دیکھا گیا جہاں فی تولہ چاندی 120 روپے کی کمی کے ساتھ 6,368 روپے پر بند ہوئی۔