آئی ایم ایف کا وسیع پیمانے پر فیول سبسڈی سکیم فوری ختم کرنے کا مطالبہ

بین الاقوامی مالیاتی فنڈ (آئی ایم ایف) نے پاکستان کے ساتھ اقتصادی جائزہ مذاکرات کے کامیاب اختتام پر باضابطہ اعلامیہ جاری کر دیا ہے، جس کے تحت پاکستان اور آئی ایم ایف کے درمیان اسٹااف لیول معاہدہ طے پا گیا ہے۔ اس معاہدے کے تحت آئی ایم ایف ایگزیکٹو بورڈ کی منظوری کے بعد پاکستان کو 1.21 ارب ڈالر کی اہم قسط موصول ہو گی۔ عالمی مالیاتی ادارے نے تسلیم کیا کہ پروگرام کے نفاذ سے پاکستان میں معاشی استحکام آیا ہے، اصلاحات کا عمل تیز تر ہوا ہے اور جولائی تا مارچ 2026 کے دوران معاشی نمو 4 فیصد رہی، جبکہ مشرقِ وسطیٰ کے بحران کے باعث شرحِ نمو 3.6 فیصد تک اثر انداز ہوئی۔

اعلامیے میں آئی ایم ایف نے حکومتِ پاکستان سے مطالبہ کیا ہے کہ وہ وسیع پیمانے پر دی جانے والی مہنگی فیول سبسڈی اسکیم کو فوری ختم کرے اور مستقبل میں پٹرولیم مصنوعات کی قیمتیں بڑھنے پر سبسڈی کا دائرہ کار صرف مخصوص مستحقین تک محدود رکھے۔ مزید برآں، ادارے نے توانائی کے شعبے میں گردشی قرضوں کی وصولی، گیس سیکٹر کے نقصانات میں کمی، بروقت ٹیرف ایڈجسٹمنٹ اور زرمبادلہ کے ذخائر بڑھانے پر زور دیا ہے۔ آئی ایم ایف نے اسٹیٹ بینک کو افراطِ زر پر قابو پانے کے لیے سخت مانیٹری پالیسی برقرار رکھنے کی بھی ہدایت کی ہے۔