خیبر پختونخوا میں پی ٹی آئی کی 13 سالہ حکمرانی، کارکردگی پر بڑا سوالیہ نشان ہے: امیر مقام

وفاقی وزیر اور مسلم لیگ (ن) کے سینئر رہنما انجینئر امیر مقام نے اسلام آباد میں پریس کانفرنس کرتے ہوئے خیبر پختونخوا میں پاکستان تحریک انصاف (پی ٹی آئی) کے 13 سالہ اقتدار کو شدید تنقید کا نشانہ بنایا ہے۔ انہوں نے صوبائی حکومت اور وزیراعلیٰ پر عوامی مسائل سے مکمل عدم توجہی اور ناکام گورننس کا الزام عائد کرتے ہوئے صوبے میں بدامنی کی مسلسل بگڑتی صورتحال پر شدید تشویش کا اظہار کیا۔

امیر مقام کا کہنا تھا کہ صوبے میں روزانہ کی بنیاد پر دہشت گردی اور ناخوشگوار واقعات پیش آ رہے ہیں لیکن صوبائی قیادت عملی اقدامات کے بجائے محض سیاسی نعرے بازی اور سوشل میڈیا پر ویڈیوز بنانے تک محدود ہے۔ انہوں نے سوال اٹھایا کہ 13 سالہ دورِ حکومت میں عوام کو کیا ریلیف ملا؟ پی ٹی آئی کے پاس دکھانے کے لیے ایک بھی قابلِ ذکر کامیابی نہیں ہے۔ وفاقی وزیر نے زور دیا کہ خیبر پختونخوا کے عوام کو درپیش مسائل کے حل اور امن و امان کی بہتری کے لیے اب ڈرامے بازی کے بجائے مؤثر حکمرانی کی ضرورت ہے۔