حکومت نے اچانک مذاکراتی میز پر دہشت گردی کا ایجنڈا رکھا، ایمرجنسی اور گورنر راج کی باتیں کی گئیں: راجہ ناصر عباس

سینیٹ میں قائدِ حزبِ اختلاف علامہ راجہ ناصر عباس نے سنسنی خیز انکشاف کرتے ہوئے کہا ہے کہ حکومت نے سیاسی مذاکرات کے دوران اچانک اور بغیر کسی پیشگی اطلاع کے دہشت گردی کا ایجنڈا میز پر رکھ دیا۔ انہوں نے وضاحت کی کہ اپوزیشن صرف بانی چیئرمین پی ٹی آئی سے ملاقات اور ان کے مسائل کے حل کے لیے مذاکرات کی میز پر آئی تھی، تاہم جب محسن نقوی اور طلال چوہدری پر مشتمل حکومتی کمیٹی نے دہشت گردی کا معاملہ اٹھایا تو اپوزیشن کمیٹی کے سربراہ بیرسٹر گوہر نے اس پر شدید ناراضی کا اظہار کیا۔

علامہ راجہ ناصر عباس کا کہنا تھا کہ حکومت نے مذاکرات کے دوران خیبر پختونخوا میں ایمرجنسی، گورنر راج اور آپریشن جیسے سخت آپشنز کا بھی ذکر کیا۔ انہوں نے زور دیا کہ دہشت گردی کے خلاف کوئی بھی اقدام مولانا فضل الرحمن، ن لیگ، پیپلز پارٹی اور تمام سیاسی اسٹیک ہولڈرز کی باہمی مشاورت سے ہی مؤثر ہو سکتا ہے۔ انہوں نے واضح کیا کہ بانی چیئرمین کی توثیق کے بغیر کیا گیا کوئی بھی فیصلہ قابلِ عمل ہوگا نہ ہی پائیدار، کیونکہ پاکستان کے سیاسی و معاشی اور امن و امان کے بحران کا حل بانی چیئرمین کی شمولیت کے بغیر ممکن نہیں ہے۔