شام حوثیوں کیخلاف لڑنے کیلئے یمن میں اپنی فوج بھیجنے پر غور کر رہا ہے، امریکی نیوز ویب سائٹ

امریکی خبر رساں ویب سائٹ ‘ایگزیوس’ (Axios) نے 3 امریکی حکام کے حوالے سے انکشاف کیا ہے کہ شام نے یمن میں حوثی باغیوں کے خلاف جاری زمینی کارروائیوں میں حصہ لینے کے لیے اپنے 10 ہزار سے 20 ہزار فوجی بھیجنے پر غور شروع کر دیا ہے۔ رپورٹ کے مطابق ریاض میں منعقدہ حالیہ اجلاس کے دوران سعودی ولی عہد شہزادہ محمد بن سلمان اور شامی صدر احمد الشرع کے درمیان اس تجاویز پر تفصیلی بات چیت ہوئی۔

حکام کے مطابق سعودی عرب کی حمایت یافتہ یمنی فورسز کی مدد اور دارالحکومت صنعا و باب المندب کو حوثیوں سے واگزار کرانے کے لیے شامی فوجی دستوں کو تعینات کرنے کی درخواست کی گئی ہے، جن میں دمشق کے قریب تعینات 90ویں ڈویژن اور 84ویں ڈویژن کے شامل ہونے کا امکان ہے۔ رپورٹ میں بتایا گیا ہے کہ امریکی صدر ٹرمپ کی انتظامیہ اور امریکی سینٹرل کمانڈ (CENTCOM) نے بھی ان مذاکرات پر مشاورت کی ہے اور امریکہ کو اصولی طور پر دو اہم اتحادیوں کے اس مجوزہ سیکیورٹی تعاون پر کوئی اعتراض نہیں ہے۔