چیٹ جی پی ٹی میں اشتہارات کا دائرہ کار بڑھانے کا فیصلہ

مصنوعی ذہانت کے معروف پلیٹ فارم چیٹ جی پی ٹی کے صارفین کو مستقبل میں مزید اشتہارات دیکھنے کو ملیں گے کیونکہ اوپن اے آئی نے چیٹ بوٹ میں اشتہارات کے دائرہ کار کو بڑھانے کا فیصلہ کیا ہے۔ رواں سال کے آغاز میں شروع کی گئی ابتدائی آزمائش کے بعد اب کمپنی ایک نئے بصری فارمیٹ پر کام کر رہی ہے، جس کے تحت چیٹ جی پی ٹی کی جانب سے تصاویر تیار کیے جانے کے دوران بھی اشتہار دکھایا جائے گا۔ اس نئے فارمیٹ کی ابتدائی آزمائش کا آغاز امریکہ میں محدود اشتہاری کمپنیوں کے ساتھ کیا جا رہا ہے، تاہم کمپنی کے مطابق مستقبل میں ان اشتہارات کا دائرہ کار دیگر ممالک اور چیٹ جی پی ٹی کے مختلف حصوں تک بھی پھیلایا جا سکتا ہے۔ اوپن اے آئی کا مؤقف ہے کہ مفت سروسز کی فراہمی، اے آئی ٹیکنالوجی اور بنیادی ڈھانچے کے اخراجات پورے کرنے کے لیے اشتہارات کا یہ نظام ناگزیر ہے۔