نیویارک: 72 گھنٹے کے گرینڈ آپریشن میں لاپتہ اور انسانی اسمگلنگ کا شکار 34 بچے بازیاب

نیویارک میں قانون نافذ کرنے والے مختلف اداروں نے ایک مشترکہ اور منظم گرینڈ آپریشن کے دوران لانگ آئی لینڈ اور کوئنز سے لاپتہ ہونے والے 34 بچوں کو باحفاظت بازیاب کروا لیا ہے۔ حکام کے مطابق محض 72 گھنٹے تک جاری رہنے والے اس “لانگ آئی لینڈ چلڈرن ریسکیو آپریشن” کے ذریعے 7 سے 18 سال کی عمر کے بچوں کو تلاش کیا گیا، جن میں سے کچھ بچے چند دنوں سے جبکہ بعض گزشتہ 10 سالوں سے لاپتہ تھے۔ اگرچہ بازیاب کرائے گئے زیادہ تر بچے گھروں سے بھاگے ہوئے تھے، تاہم ان میں سے کچھ کو شدید انسانی اسمگلنگ اور سنگین استحصال کا نشانہ بنایا گیا تھا۔

نیویارک اسٹیٹ پولیس کے سپرنٹنڈنٹ اسٹیون جیمز نے ایک بیان میں بتایا کہ سال 2025 کے دوران ریاست میں 18 سال سے کم عمر کے 10,629 بچوں کی گمشدگی رپورٹ ہوئی تھی، جن میں سے 94 فیصد گھروں سے بھاگنے کے واقعات تھے۔ ناساؤ کاؤنٹی کے علاقے گارڈن سٹی میں قائم کمانڈ سینٹر سے کی جانے والی اس تین روزہ کارروائی کے بعد بازیاب تمام بچوں کو حمایتی اور بحالی کی خدمات سے منسلک کر دیا گیا ہے۔