ایران اپنے لیے مشکل یا آسان راستہ اختیار کر سکتا ہے: ٹرمپ

امریکی صدر ڈونلڈ ٹرمپ نے ایران کے ساتھ جاری شدید کشیدگی پر اہم بیان دیتے ہوئے کہا ہے کہ ایران اور امریکہ کے درمیان درپیش تنازع یا تو آسان راستے سے حل ہو سکتا ہے یا پھر مشکل راستے سے۔ امریکی ریاست اوہائیو کے شہر وینڈالیا میں انتخابی ریلی کے لیے روانگی کے وقت صحافیوں سے گفتگو کرتے ہوئے ڈونلڈ ٹرمپ نے بتایا کہ انہیں ایران سے متعلق ایک بڑا حتمی فیصلہ کرنا ہے۔ انہوں نے انتظامیہ کے اقدامات کا دفاع کرتے ہوئے دعویٰ کیا کہ امریکی کارروائیوں کے نتیجے میں ایران اس وقت انتہائی کمزور ہو چکا ہے اور وہ جوہری ہتھیار حاصل کرنے کے بیشتر منصوبے ترک کرنے پر مجبور ہوا ہے، جبکہ عالمی منڈی میں تیل کی قیمتیں کم کرنے میں بھی کامیابی ملی ہے۔

دوسری جانب امریکی وزیرِ جنگ پیٹ ہیگستھ نے خبردار کیا ہے کہ ایران کو اپنا جوہری پروگرام رضاکارانہ طور پر ترک کرنے کا سنہری موقع دیا گیا ہے، لیکن اگر اس نے ایسا نہ کیا تو عسکری قوت کے ذریعے مجبور کیا جا سکتا ہے۔ اسی اثناء میں غیر ملکی خبر ایجنسی ‘رائٹرز’ کے مطابق ایران امریکی جارحیت کا مقابلہ کرنے کے لیے سخت جوابی تیاری کر رہا ہے۔ ایرانی حکام نے واضح کیا ہے کہ اگر امریکہ نے دوبارہ بڑے پیمانے پر حملے کیے تو اس کا جواب پہلے سے کہیں زیادہ شدید ہوگا اور امریکی کارروائیوں کی سہولت کاری کرنے والے علاقائی ممالک کو بھی ہدف بنایا جا سکتا ہے۔ واضح رہے کہ تہران اپنے جوہری پروگرام کو ہمیشہ مکمل طور پر پرامن اور دفاعی قرار دیتا رہا ہے۔