حماس کی مالی معاونت کا الزام: امریکا نے 5 افراد اور اداروں پر پابندیاں عائد کردیں

امریکی محکمہ خزانہ نے حماس کی مالی معاونت اور فنڈز کی منتقلی کے الزام میں 5 افراد اور ان سے وابستہ اداروں پر باضابطہ پابندیاں عائد کر دی ہیں۔ امریکی حکام کے مطابق ان افراد اور اداروں نے 2020 سے 2026 تک حماس کو 20 لاکھ ڈالر سے زائد رقم منتقل کی، جس کے لیے کرپٹو کرنسی نیٹ ورکس اور جعلی شیل کمپنیوں کا استعمال کیا گیا۔

ان پابندیوں کے تحت فرانس میں قائم 2 مبینہ جعلی خیراتی اداروں کو بھی ہدف بنایا گیا ہے جو امدادی کاموں کے نام پر فنڈز جمع کر کے حماس کو فراہم کر رہے تھے۔ امریکی اقدام کے بعد تمام نامزد افراد اور اداروں کے امریکہ میں موجود تمام اثاثے فوری طور پر منجمد کر دیے گئے ہیں اور امریکی شہریوں یا مالیاتی اداروں کے ان کے ساتھ کسی بھی قسم کے لین دین پر پابندی عائد کر دی گئی ہے۔