طلبہ وفد کا واشنگٹن میں پاکستانی سفارتخانے کا دورہ، سفارتی کردار میں اظہار دلچسپی

امریکہ کی ہارٹ فورڈ یونیورسٹی کے بین الاقوامی طلباء کے ایک وفد نے واشنگٹن میں سفارتخانہ پاکستان کا دورہ کیا، جہاں سفیر پاکستان رضوان سعید شیخ نے طلباء کو پاکستان کی سفارتی ترجیحات، عالمی و علاقائی امن کے لیے کوششوں اور پاک امریکہ تعلقات کے مختلف پہلوؤں سے آگاہ کیا۔ پیس اینڈ جسٹس ایسوسی ایشن کانفرنس میں شرکت کے لیے آنے والے اس وفد میں البانیہ، گھانا، انڈونیشیا، لبنان اور امریکہ سمیت مختلف ممالک کے طلباء شامل تھے۔ اس موقع پر گفتگو کرتے ہوئے سفیر رضوان سعید شیخ نے کہا کہ پاکستان کی امن پر مرکوز سفارت کاری آٹھ دہائیوں پر محیط ہے اور پاکستان ماضی میں امریکہ اور چین کے درمیان پل کا کردار ادا کر چکا ہے۔ انہوں نے کہا کہ اسلام آباد مفاہمتی یادداشت (MoU) پاکستان کی خاموش، انتھک اور مؤثر سفارت کاری کا نتیجہ ہے، اور پاکستان موجودہ ایران امریکہ کشیدگی کے تناظر میں بھی خطے میں امن کے حصول کے لیے اتحادیوں کے ساتھ مل کر فعال کردار ادا کر رہا ہے۔ طلباء نے بین الاقوامی سفارتی سطح پر پاکستان کے اس کردار میں خصوصی دلچسپی کا اظہار کیا۔