پاکستان ایس سی او سربراہ اجلاس کی کامیاب میزبانی کیلئے پرعزم ہے: اسحاق ڈار

نائب وزیراعظم اور وزیر خارجہ اسحاق ڈار نے کہا ہے کہ پاکستان شنگھائی تعاون تنظیم (SCO) کے 2027 میں ہونے والے سربراہ اجلاس کی شاندار اور کامیاب میزبانی کے لیے مکمل طور پر پرعزم ہے۔

نائب وزیراعظم کی زیر صدارت ایک اہم اعلیٰ سطحی اجلاس منعقد ہوا، جس میں سال 2027 میں ایس سی او سربراہانِ مملکت کی کونسل کے اجلاس کی میزبانی کے حوالے سے اب تک کی جانے والی تیاریوں اور انتظامات کا تفصیلی جائزہ لیا گیا۔ اجلاس کے دوران میگا ایونٹ کی تیاریوں، سکیورٹی، پروٹوکول اور دیگر انتظامی امور پر پیش رفت کا بغور جائزہ لیا گیا، جس پر نائب وزیراعظم نے اطمینان کا اظہار کیا۔

اسحاق ڈار نے تمام متعلقہ اداروں اور حکام کو سخت ہدایات جاری کرتے ہوئے کہا کہ اجلاس کی میزبانی سے متعلق تمام تر تیاریوں کو طے شدہ ٹائم لائن کے مطابق بروقت مکمل کیا جائے اور اس سلسلے میں جملہ امور کو مقررہ مدت کے اندر پایۂ تکمیل تک پہنچایا جائے۔ انہوں نے اعادہ کیا کہ پاکستان عالمی سطح کے اس اہم ترین ایونٹ کو بھرپور طریقے سے کامیاب بنانے کے لیے تمام ممکنہ وسائل اور صلاحیتیں بروئے کار لائے گا۔