پنجاب اور خیبرپختونخوا میں شدید دھند کا راج، موٹرویز کے اہم سیکشنز بند

پنجاب اور خیبرپختونخوا کے مختلف علاقوں میں شدید دھند نے حد نگاہ کو انتہائی کم کر دیا ہے، جس کے باعث شہریوں کی حفاظت کو یقینی بنانے کے لیے موٹرویز کے متعدد اہم سیکشنز کو ٹریفک کے لیے بند کر دیا گیا ہے۔

حکام نے ایم ون پشاور ٹول پلازہ سے رشکئی انٹرچینج، ایم تھری درکھانہ سے جڑانوالہ، ایم فور شیر شاہ سے خانیوال اور گوجرہ سے شورکوٹ کو ہر قسم کے ٹریفک کے لیے بند کر دیا ہے۔ اسی طرح، ایم فائیو موٹروے پر رحیم یار خان سے روہڑی اور ملتان سے ظاہر پیر تک کا سفر بھی معطل ہے۔ قومی شاہراہ پر بھی صورتحال خاصی متاثر کن ہے، جہاں حد نگاہ کم ہو کر محض 100 میٹر رہ گئی ہے، جس کی وجہ سے ٹریفک کی روانی بری طرح متاثر ہو رہی ہے۔

ترجمان موٹر وے پولیس کا کہنا ہے کہ فوگ سیزن کے پیش نظر شہری دن کے اوقات میں سفر کو ترجیح دیں، کیونکہ صبح 10 بجے سے شام 6 بجے تک کے اوقات دھند کے اثرات سے قدرے محفوظ ہوتے ہیں۔ پولیس نے ڈرائیوروں کو غیر ضروری سفر سے گریز کرنے اور سفر کی صورت میں فوگ لائٹس کے استعمال کی سختی سے ہدایت کی ہے۔