ایران سعودی عرب اور حوثیوں میں جنگ ختم کرانا چاہتا ہے: محسن رضائی

ایران کی قومی سلامتی کونسل کے سیکرٹری محسن رضائی نے اہم سفارتی پیش رفت کا انکشاف کرتے ہوئے کہا ہے کہ ایران، سعودی عرب اور یمنی حوثیوں (انصار اللہ) کے درمیان طویل جنگ کے مستقل خاتمے کا خواہاں ہے۔ انہوں نے بتایا کہ حوثی بھی سعودی عرب کے ساتھ باضابطہ معاہدے میں دلچسپی رکھتے ہیں، اور اس سلسلے میں پاکستان اور قطر بطور ثالث فعال کردار ادا کر رہے ہیں۔ محسن رضائی کے مطابق معاہدے کے لیے ابتدائی شرائط ثالثوں کے پاس جمع کروائی جا چکی ہیں اور ان کے ساتھ مسلسل مشاورت کا عمل جاری ہے۔

علاقائی اور عالمی تناؤ پر بات کرتے ہوئے محسن رضائی نے امریکی صدر ڈونلڈ ٹرمپ کی دھمکیوں کو مسترد کرتے ہوئے کہا کہ ایران کسی بھی فیصلہ کن جنگ کے لیے مکمل طور پر تیار ہے اور واشنگٹن کے مفاد میں یہی ہوگا کہ وہ اسرائیلی وزیراعظم نیتن یاہو کی بھڑکائی ہوئی جنگ سے نکلنے کی شرائط کو تسلیم کرے۔ انہوں نے خبردار کیا کہ ایران اب امریکی فوج کی تمام تر کمزوریوں سے آگاہ ہے اور امریکی طیارہ بردار بحری جہاز کے قریب بحری جہاز شکن میزائل کے کامیاب تجربے سے اپنی تیاری کا مظاہرہ کر چکا ہے۔ اگر ایران پر کسی قسم کی بھی ایڈونچر ازم یا حملہ کیا گیا تو خطے میں قائم تمام امریکی عسکری اڈوں کو پہلے سے کہیں زیادہ شدومد کے ساتھ نشانہ بنایا جائے گا۔