پاکستان سعودی عرب کے دفاع کیلئے کسی بھی حد تک جائے گا: ڈی جی آئی ایس پی آر

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) لیفٹیننٹ جنرل احمد شریف چودھری نے کہا ہے کہ پاکستان سعودی عرب کے دفاع، سلامتی اور پائیدار تحفظ کے لیے کسی بھی حد تک جانے کے لیے تیار ہے۔ ‘عرب نیوز’ کو دیے گئے ایک اہم انٹرویو میں ڈی جی آئی ایس پی آر نے واضح کیا کہ پاکستان سعودی عرب کے ساتھ سفارتی اور عملی میدان میں مکمل اور چٹان کی طرح کھڑا ہے، اور اس کا یہ دفاعی و مذہبی عزم مکہ مکرمہ اور مدینہ منورہ جیسے مقدس ترین مقامات کے مطلق تحفظ پر محیط ہے۔

لیفٹیننٹ جنرل احمد شریف چودھری نے زور دے کر کہا کہ سعودی عرب کی سلامتی کے لیے پاکستان کا عزم غیر مشروط ہے، جس کی بنیاد دونوں برادر ممالک کے عوام، مسلح افواج اور قیادت کے درمیان قائم دیرینہ اور تاریخی تعلقات ہیں۔ انہوں نے بتایا کہ پاکستان اس وقت سعودی قیادت کے ساتھ مسلسل رابطے میں ہے اور علاقائی حکومتوں کی مشاورت سے امن کے قیام کے لیے کوشاں ہے۔ اس کے علاوہ انہوں نے ‘اسلام آباد مفاہمتی یادداشت’ کو موجودہ پیچیدہ عسکری صورتحال کا واحد حقیقی حل قرار دیتے ہوئے کہا کہ پاکستان، واشنگٹن اور تہران کو دوبارہ مذاکرات کی میز پر لانے کے لیے مشترکہ اور مثبت بنیادیں تلاش کر رہا ہے۔