حوثیوں کے حملے: عرب ممالک اور یورپی یونین کا سعودیہ سے مکمل اظہار یکجہتی

عرب ممالک اور یورپی یونین نے سعودی عرب پر حوثی باغیوں کے حالیہ حملوں کی شدید الفاظ میں مذمت کرتے ہوئے سعودی حکومت اور عوام کے ساتھ کامل یکجہتی کا اظہار کیا ہے۔ اردن اور کویت نے ان حملوں کو سعودی عرب کی سلامتی، خودمختاری اور بین الاقوامی قوانین کی کھلی خلاف ورزی قرار دیتے ہوئے مملکت کے تمام دفاعی اقدامات کی مکمل حمایت کا اعادہ کیا ہے۔ بحرین نے حملے کی پرزور مذمت کرتے ہوئے واضح کیا کہ سعودی عرب کا امن و استحکام بحرین کی قومی سلامتی کا لازمی حصہ ہے، جبکہ منامہ انتظامیہ نے اقوامِ متحدہ کی سلامتی کونسل سے حوثیوں کے بار بار ہونے والے حملوں پر سخت موقف اختیار کرنے اور ذمہ داروں کا احتساب یقینی بنانے کا مطالبہ کیا۔

دوسری جانب، یورپی یونین نے بھی حوثی حملوں کی سخت مذمت کرتے ہوئے ریاض کے ساتھ مکمل یکجہتی کا اظہار کیا ہے۔ یورپی یونین کے شعبہ خارجہ امور کے ترجمان انور العنونی نے اپنے بیان میں کہا کہ عام شہریوں اور شہری تنصیبات کو نشانہ بنانا کسی صورت قابلِ قبول نہیں، اور انہوں نے حوثیوں سے تمام عسکری کارروائیاں فوری طور پر روکنے کا مطالبات کیا۔ یورپی بلاک نے خبردار کیا کہ حوثیوں کی متواتر کارروائیاں یمن تنازع کے پرامن اور سیاسی حل کے امکانات کو شدید نقصان پہنچا رہی ہیں۔ یورپی یونین نے خطے میں کشیدگی کم کرنے اور جامع امن کے قیام کے لیے اقوامِ متحدہ اور عالمی برادری کے ساتھ مل کر کوششیں جاری رکھنے کے عزم کا اعادہ بھی کیا۔