طاقت اور دباؤ سے مطالبات منوانے کا یک طرفہ نظام ختم ہو چکا، باقر قالیباف

ایرانی پارلیمنٹ کے اسپیکر باقر قالیباف نے عالمی سیاسی صورتحال پر ایک اہم بیان جاری کرتے ہوئے کہا ہے کہ طاقت، دھونس اور دباؤ کے ذریعے اپنے من پسند مطالبات منوانے والا یک طرفہ عالمی نظام (Unipolar World Order) اب مکمل طور پر ختم ہو چکا ہے۔ ایک سرکاری بیان میں ان کا کہنا تھا کہ موجودہ حالات میں عالمی سطح پر کثیر الجہتی نظام (Multilateralism) کا تحفظ اور بین الاقوامی قانون کی حکمرانی کا احترام پہلے سے کہیں زیادہ ضروری ہو گیا ہے۔

باقر قالیباف نے حال ہی میں سلامتی کونسل میں ایران سے متعلق امریکی موقف کو ویٹو کرنے پر چین اور روس کے کردار کی تعریف کرتے ہوئے کہا کہ بیجنگ اور ماسکو نے اقوامِ متحدہ کی سلامتی کونسل کے سیاسی استعمال کو دوٹوک انداز میں مسترد کر کے قانون کی حکمرانی اور غیر جانب داری کے اصولوں کا اعادہ کیا ہے۔ ایرانی اسپیکر نے زور دے کر کہا کہ عالمی امور میں یک طرفہ زور زبردستی کا طرزِ عمل کسی بھی ملک کے مفاد میں نہیں۔ انہوں نے عالمی برادری سے اپیل کی کہ بین الاقوامی تنازعات اور مسائل کے پائیدار حل کے لیے طاقت اور دباؤ کی پالیسی کو ترک کر کے قانون، باہمی احترام اور کثیر الجہتی تعاون کو بنیادی محور بنایا جائے۔