اماراتی وزیر خارجہ کی امریکی مشیر مسعد بولس سے ملاقات، سٹریٹجک تعلقات پر تبادلہ خیال

متحدہ عرب امارات کے وزیرِ خارجہ شیخ عبداللہ بن زاید آل نہیان سے امریکی صدر کے عرب اور افریقی امور کے اعلیٰ مشیر مسعد بولس نے اہم ملاقات کی ہے۔ ابوظہبی میں ہونے والی اس ملاقات کے دوران متحدہ عرب امارات اور امریکہ کے درمیان دیرینہ اسٹریٹجک تعلقات، دوطرفہ تعاون کے فریم ورک اور باہمی دلچسپی کے متعدد شعبوں پر تفصیلی تبادلہ خیال کیا گیا۔

ملاقات میں مشرقِ وسطیٰ کی مجموعی سیکیورٹی اور موجودہ صورتحال سمیت اہم علاقائی و بین الاقوامی پیش رفت پر جامع بات چیت کی گئی۔ دونوں رہنماؤں نے خطے میں امن و استحکام کے فروغ اور جاری کشیدگی کے خاتمے کے لیے مشترکہ سفارتی کوششیں تیز کرنے پر اتفاق کیا۔ اماراتی وزیرِ خارجہ نے امریکہ کے ساتھ دوطرفہ تعلقات کو مزید مضبوط بنانے کے عزم کا اعادہ کیا، جبکہ امریکی مشیر نے علاقائی سلامتی اور معاشی شراکت داری کے فروغ میں یو اے ای کے اہم کردار کی تعریف کی۔