یورپی یونین کا دیگر ممالک سے ملکر اپنی سکیورٹی کونسل بنانے کا اعلان

یورپی کمیشن کی صدر ارسلا فان ڈیر لاین نے ایک تاریخی پیشرفت کا اعلان کرتے ہوئے کینیڈا کو یورپی یونین کا پہلا ‘ایسوسی ایٹ ممبر’ (Associate Member) بنانے اور یورپی سیکورٹی کونسل کے قیام کی تجویز پیش کر دی ہے۔ یہ غیر معمولی تجویز ایک ایسے وقت میں سامنے آئی ہے جب کینیڈا اور امریکہ کے درمیان تجارتی کشیدگی اور تنازعات شدید ترین سطح پر پہنچ چکے ہیں۔ امریکی صدر ڈونلڈ ٹرمپ کی جانب سے کینیڈا پر متعدد تجارتی پابندیاں اور اسے امریکہ کی ’51ویں ریاست’ بنانے کی بارہا بات کی گئی، جسے کینیڈین وزیراعظم مارک کارنی نے سختی سے مسترد کرتے ہوئے ملکی خودمختاری پر کوئی سمجھوتہ نہ کرنے کا عزم ظاہر کیا ہے۔

کینیڈا کے یورپ کے ساتھ گہرے تاریخی اور ثقافتی روابط ہیں اور اس کا پارلیمانی جمہوری نظام، یونیورسل ہیلتھ کیئر اور سماجی بہبود کے ادارے یورپی ماڈل کے انتہائی قریب ہیں، تاہم جغرافیائی طور پر یورپ سے باہر ہونا اس کی مکمل رکنیت کے لیے بنیادی رکاوٹ رہا ہے۔ اسی تناظر میں ایسوسی ایٹ ممبرشپ کا فارمولا کینیڈا کو دفاع، توانائی، اہم معدنیات اور مصنوعی ذہانت (AI) کے شعبوں میں یورپی یونین کے ساتھ گہری وابستگی اور شراکت داری کی اجازت دے گا۔ واضح رہے کہ یورپی یونین کا حصہ بننے کے لیے تمام 27 رکن ممالک کی متفقہ منظوری لازمی ہوتی ہے، اور اس مجوزہ الحاق کو خطے میں ایک نیا معاشی اور دفاعی بلاک قائم کرنے کی سمت اہم قدم قرار دیا جا رہا ہے۔