ٹیکنالوجی سے عوامی خدمات کی فراہمی بہتر بنانا ترجیح ہے: اسحاق ڈار

نائب وزیراعظم و وزیرِ خارجہ سینیٹر محمد اسحاق ڈار کی زیرِ صدارت آئی ٹی اور ڈیجیٹل ٹیکنالوجیز سے متعلق ایک اعلیٰ سطحی جائزہ اجلاس اسلام آباد میں منعقد ہوا۔ اجلاس کے دوران انفارمیشن ٹیکنالوجی کے شعبے میں جاری منصوبوں، ڈیجیٹلائزیشن اور عوامی سہولیات کی فراہمی میں جدید ٹیکنالوجی کے استعمال سے متعلق حکمتِ عملی کا تفصیلی جائزہ لیا گیا۔ اس موقع پر گفتگو کرتے ہوئے اسحاق ڈار نے زور دیا کہ جدید ٹیکنالوجی کو مؤثر انداز میں استعمال کر کے عوامی خدمات کے معیار اور فراہمی کو بہتر بنانا موجودہ حکومت کی اولین ترجیحات میں شامل ہے۔

نائب وزیراعظم نے مزید کہا کہ اس اقدام کا بنیادی مقصد عام شہریوں کے لیے تمام سرکاری سہولیات اور خدمات میں کارکردگی، شفافیت، آسان رسائی اور سہولت کو یقینی بنانا ہے۔ اجلاس میں وزیرِ مملکت برائے آئی ٹی و ٹیلی کمیونیکیشن شزہ فاطمہ خواجہ، معاونِ خصوصی برائے وزیراعظم طارق باجوہ کے علاوہ وزارتِ آئی ٹی، ٹیلی کام اور دیگر متعلقہ محکموں کے سینئر حکام نے بھی شرکت کی اور ڈیجیٹل پاکستان کے وژن کی تکمیل سے متعلق آئندہ کے لائحہ عمل پر مشاورت کی گئی۔