دبئی: ڈی پی ورلڈ آئی ایل ٹی ٹوئنٹی سیزن 5 کی لانچ تقریب، ایونٹ کا آغاز 22 نومبر سے ہوگا

متحدہ عرب امارات میں ڈی پی ورلڈ انٹرنیشنل لیگ ٹی ٹوئنٹی (ILT20) سیزن 5 کی باضابطہ لانچنگ تقریب 9 ستمبر کو دبئی کے معروف ہلٹن ہوٹل الحبتور سٹی کے الجود بال روم میں شاندار انداز میں منعقد ہوئی۔ اس تقریب کا بنیادی مقصد نئے سیزن کی تیاریوں کا جائزہ لینا، اہم شراکت داروں اور کرکٹ اسٹیک ہولڈرز کی حوصلہ افزائی کرنا اور یو اے ای میں لائیو اسپورٹنگ ایونٹس کی شاندار واپسی کو اجاگر کرنا تھا۔ تقریب میں پینل ڈسکشنز اور نیٹ ورکنگ کے خصوصی سیشنز بھی رکھے گئے جس میں بین الاقوامی و مقامی کرکٹ شخصیات نے شرکت کی۔

سرکاری تفصیلات کے مطابق 6 ٹیموں پر مشتمل یہ عالمی ٹورنامنٹ 22 نومبر 2026ء سے شروع ہو کر 20 دسمبر تک جاری رہے گا، جس کا فائنل معرکہ دبئی انٹرنیشنل اسٹیڈیم میں کھیلا جائے گا۔ مجموعی طور پر 34 میچز دبئی، ابوظہبی اور شارجہ کے عالمی معیار کے اسٹیڈیمز میں کھیلے جائیں گے۔ سیزن 5 سے قبل لیگ انتظامیہ نے مائیک فورڈہم کو عبوری چیف آپریٹنگ آفیسر (COO) مقرر کیا ہے جو سیزن 5 کی تمام تر انتظامی و عملی امور کی قیادت کریں گے۔ اس کے علاوہ، پری آکشن مرحلے کے تحت ڈیوڈ ملر، فن ایلن، ہینرک کلاسن اور مارکس اسٹوئنس سمیت کئی عالمی اسٹارز مختلف فرنچائزز سے منسلک ہو چکے ہیں، جبکہ راشد خان، نکولس پورن، اور سنیل نارائن جیسے نامور کھلاڑی بھی اپنی ٹیموں میں برقرار رہیں گے۔ ٹورنامنٹ کا باضابطہ پلیئر آکشن یکم اکتوبر 2026ء کو دبئی میں منعقد ہو گا جہاں فرنچائزز اپنے مکمل اسکواڈز کا نهایی انتخاب کریں گی۔