یو اے ای میں عالمی کرکٹ ستاروں کی موجودگی مقامی ٹیلنٹ کیلئے اہم موقع قرار

ڈی پی ورلڈ انٹرنیشنل لیگ ٹی 20 (ILT20) سیزن 5 کا باقاعدہ آغاز 22 نومبر 2026ء سے ہونے جا رہا ہے، جس کا فائنل معرکہ 20 دسمبر کو دبئی انٹرنیشنل اسٹیڈیم میں کھیلا جائے گا۔ دبئی میں لیگ کے پانچویں سیزن کی پیشگی تقریب کے موقع پر دنیا نیوز سے گفتگو کرتے ہوئے دنیا کے دو تیز ترین سابق اسپیڈ اسٹارز—پاکستان کے شعیب اختر اور آسٹریلیا کے بریٹ لی—نے متحدہ عرب امارات میں عالمی کرکٹ ستاروں کی موجودگی کو مقامی اور اماراتی ٹیلنٹ کی نشوونما کے لیے ایک تاریخی پیش رفت قرار دیا ہے۔

شعیب اختر کا کہنا تھا کہ آئی ایل ٹی ٹوئنٹی نے نوجوان اماراتی کھلاڑیوں کے لیے بہترین پیشہ ورانہ اور مالی مواقع پیدا کیے ہیں، جو دبئی، شارجہ اور ابوظہبی جیسے بین الاقوامی وینیوز پر اپنے جوہر دکھا رہے ہیں۔ دوسری جانب بریٹ لی نے کہا کہ مارکس اسٹوئنس، فن ایلن، ڈیوڈ ملر اور ہینرک کلاسن جیسے ورلڈ کلاس کرکٹرز کے ساتھ ڈریسنگ روم شیئر کرنے سے مقامی ٹیلنٹ کو ذہنی و جسمانی تیاری کا موقع ملے گا۔ دونوں سابق فاسٹ بولرز نے اپنی 27 سالہ پرانی دوستی اور 160 کلومیٹر فی گھنٹہ کی رفتار سے بولنگ کرنے کی حریفانہ رقابت کو بھی یاد کیا، جبکہ بریٹ لی نے خواہش ظاہر کی کہ کاش یو اے ای سے کوئی ایسا فاسٹ بولر ابھرے جو 162 کلومیٹر فی گھنٹہ کی رفتار کا عالمی ریکارڈ توڑ سکے۔