جوڈیشل کمپلیکس کی پارکنگ میں کھڑی گاڑی سے وکیل کی لاش برآمد

راولپنڈی: جوڈیشل کمپلیکس کے لائرز کلب کی پارکنگ میں پراسرار طور پر کھڑی ایک گاڑی سے مقامی وکیل کی لاش برآمد ہوئی ہے۔

پولیس ذرائع کے مطابق کار سے ملنے والی لاش کی شناخت ایڈووکیٹ ثنا اللہ کے نام سے ہوئی ہے، جبکہ مذکورہ گاڑی گزشتہ رات سے لائرز کلب کی پارکنگ میں کھڑی تھی۔ موقع پر موجود عینی شاہدین کا کہنا ہے کہ متوفی کے منہ سے جھاگ بہہ رہی تھی اور ان کے کپڑوں پر خون کے واضح نشانات بھی پائے گئے ہیں۔

اطلاع ملتے ہی راولپنڈی پولیس کی بھاری نفری نے موقع پر پہنچ کر علاقے کو گھیرے میں لے لیا اور لاش کو تحویل میں لے کر فوری پوسٹ مارٹم کے لیے ہسپتال منتقل کر دیا۔ پولیس حکام کا کہنا ہے کہ واقعے کی تمام تر پہلوؤں سے تفتیش کا آغاز کر دیا گیا ہے اور موت کی حقیقی وجوہات کا تعین پوسٹ مارٹم اور فارنسک رپورٹ موصول ہونے کے بعد ہی کیا جا سکے گا۔