نئے صوبے بننے چاہئیں، باؤنڈری کا تعین عوام کرے گی: کیپٹن (ر) صفدر

پاکستان مسلم لیگ (ن) کے سینئر رہنما کیپٹن (ر) محمد صفدر نے انتظامی بنیادوں پر نئے صوبوں کی قیام کی حمایت کرتے ہوئے کہا ہے کہ ملک میں نئے صوبے بالکل بننے چاہئیں اور ہزارہ صوبے کا قیام خود ہزارہ کے عوام کی خواہشات اور مرضی کے مطابق ہونا چاہیے۔ چناب نگر آمد کے موقع پر میڈیا نمائندگان سے گفتگو کرتے ہوئے انہوں نے زور دیا کہ نئے صوبوں کی حدود اور قیام کے لیے عوامی ریفرنڈم کروانا انتہائی ضروری ہے، کیونکہ اسمبلیوں کے اندر اکثر دباؤ ڈال کر اور بازو مروڑ کر ووٹ حاصل کیے جاتے ہیں۔ انہوں نے مطالبہ کیا کہ صوبوں کے ایسے اہم فیصلے کرتے وقت علاقائی سیاسی قیادت کو لازمی طور پر مشاورت میں شامل کیا جائے۔

کیپٹن (ر) صفدر نے مزید کہا کہ ہم اصولی طور پر نئے انتظامی صوبوں کی تشکیل کے حامی ہیں، تاہم نئے صوبوں کی حدود کا حتمی تعین وہاں کے مقامی عوام کی صوابدید پر ہونا چاہیے۔ گفتگو کے اختتام پر انہوں نے اپنی بات کی وضاحت کرتے ہوئے کہا کہ یہ ان کا بالکل ذاتی نقطۂ نظر ہے، جبکہ اس معاملے پر پاکستان مسلم لیگ (ن) کا باقاعدہ اور رسمی جماعت کا موقف جاننے کے لیے عطاء تارڑ، پرویز رشید، خواجہ آصف اور خواجہ سعد رفیق سے رابطہ کیا جائے۔