9 مئی کیس: 2023 سے روپوش سابق رکن قومی اسمبلی حماد اظہر گرفتار

 پولیس نے پاکستان تحریکِ انصاف (پی ٹی آئی) کے سینئر رہنما، سابق وفاقی وزیر اور سابق صدر پی ٹی آئی پنجاب حماد اظہر کو آر اے بازار کے قریب ایک دوست کے گھر سے گرفتار کر لیا ہے۔

پولیس ذرائع کے مطابق حماد اظہر کو انسدادِ دہشت گردی کی عدالت (ATC) کی جانب سے اشتہاری قرار دیے جانے اور دائمی وارنٹِ گرفتاری جاری ہونے کے بعد گرفتار کیا گیا ہے۔ گرفتاری کے بعد انہیں لاہور پولیس کی انویسٹی گیشن ونگ کے حوالے کر دیا گیا ہے۔ حماد اظہر 9 مئی 2023ء کے واقعات کے بعد درج ہونے والے 50 سے زائد مختلف مقدمات میں نامزد ملزم ہیں اور طویل عرصے سے روپوش تھے۔ وہ اپنے والد کے انتقال کے موقع پر منظرِ عام پر آئے تھے جس کے بعد دوبارہ روپوش ہو گئے تھے۔

ذرائع کے مطابق حماد اظہر نے گرفتاری سے قبل حفاظتی ضمانت کے لیے لاہور اور پشاور ہائی کورٹ سے رجوع کر رکھا تھا، جبکہ مقدمات کے اندراج اور قانونی پیچیدگیوں کے باعث وہ پارٹی کے صوبائی عہدے سے پہلے ہی مستعفی ہو چکے تھے۔ پولیس حکام کا کہنا ہے کہ ملزم کو 9 مئی سے متعلقہ مقدمات میں قانونی تفتیش کے لیے متعلقہ عدالتوں کے سامنے پیش کیا جائے گا۔